નડાબેટ સીમા દર્શન: શું તમે નડાબેટના રોમાંચક અનુભવો માટે તૈયાર છો?

નડાબેટ બોર્ડર ખાતે આર્ટ ગેલેરી, મ્યુઝિયમ, ઓડિટોરિયમ, ફૂડ ઝોન , વિશાળ ગાર્ડન, બાળકો માટે ગેમ ઝોન, સહિત અનેક સુવિધા ઉપલબ્ધ કરવામાં આવી છે. નડાબેટ બોર્ડર ઉપર મ્યુઝીયમ બનાવવામાં આવ્યું છે, જેમાં સરહદ પર જવાનો કઈ રીતે 365 દિવસ ફરજ બજાવે છે, તેઓના લાઇફ પર એક થીમ બનાવી છે. સૈનિકોના પૂતળા મુકવામાં આવ્યા છે. તેઓ બોર્ડર ઉપર જે પોતાની ફરજ બજાવતા હોય છે તે દ્રશ્યો લોકોને આ મ્યુઝિયમના માધ્યમથી જોવા મળે છે. તેમજ એક 500 લોકોની કેપેસિટીનું ઓડિટોરિયમ બનાવ્યું છે, જેમાં BSFના જવાનો દ્વારા ડોક્યુમેન્ટરી બતાવવામાં આવે છે. દરરોજ સાંજે 5:00 વાગે પરેડ યોજાય છે. આ ટુરિઝમ પ્રોજેકટ પર આવતા પ્રવાસીઓ માટે નાસ્તાની, જમવાની પણ વ્યવસ્થા કરાઈ છે. સાથે બાળકો માટે ગેમિંગઝોન પણ બનાવાયુ છે. ટી-જંકશન અને 0-પોઇન્ટ પ્રવાસીઓને અન્ય ઘણા આકર્ષણો સાથે રસપ્રદ અનુભવ આપે છે. એક ઉંચો વૉચ-ટાવર ખાસ કરીને મુલાકાતીઓને શૂન્ય રેખાની પારનો નજારો તેમજ સંખ્યાબંધ મનોહર સ્થળોનો નજારો આપવા માટે બનાવવામાં આવ્યો છે. ટુરિસ્ટની એન્ટ્રી ફી એક વ્યક્તિના રૂપિયા 100 અને 12 વર્ષથી નાની ઉંમરના બાળકોના રૂપિયા 50 રખાયા છે. શાળા અને કોલેજના વિદ્યાર્થીઓ માટે રૂપિયા 50 ફી રખાઇ છે. શાળા કોલેજના વિદ્યાર્થીઓને તમામ પ્રકારનું માર્ગદર્શન ત્યાંના સ્ટાફ દ્વારા આપવામાં આવે છે.

ભારત-પાકિસ્તાન સરહદ નજીક નડાબેટ વિસ્તારમાં સુઇગામ ગામ પાસે નડેશ્વરી માતાનું મંદિર આવેલું છે. આ મંદિર દેવી નાડેશ્વરીને સમર્પિત છે. આ મંદિરની ખાસિયતની વાત કરવામાં આવે તો, ૧૯૭૧ના યુદ્ધ બાદ આ મંદિરમાં પૂજા પણ દેશના જવાનો કરે છે. દેશની સરહદ પર ફરજ બજાવતા દેશના જવાનો દેશની રક્ષા સાથે મંદિરમાં મા નડેશ્વરની પૂજા અર્ચના પણ કરે છે. કહેવાય છે કે, માતાજી પણ દેશના જવાનોની સાથે બોર્ડેરની રક્ષા કરે છે. આ મંદિરની સાથે બનાસકાંઠા જિલ્લામાં આવેલ અન્ય સ્થળોની પણ આપ મુલાકાત લઇ શકો છો.

નડાબેટની મુલાકાત જ્યારે પણ લેવા માટે જાઓ ત્યારે તમારું કોઈપણ સરકાર માન્ય આઈડી જેમ કે આધાર કાર્ડ, પાસપોર્ટ જેવા ઓળખપત્ર સાથે રાખવા. મુલાકાતનો સમય અહીંયા સવારે 9 વાગ્યાથી સાંજે 7વાગ્યા સુધી છે અને દરરોજ સાંજે 5:00 વાગે પરેડ યોજાય છે. ઝીરો પોઇન્ટની મુલાકાત માટેનો સમય સવારે 9 થી સાંજે 4 સુધીનો છે જેની ખાસ નોંધ લેવી.

નડાબેટ સીમા પર પ્રવાસ કરવાનો અનુભવ એક વિશેષ અનુભવ છે જે પ્રવાસીઓને જીવનમાં એક અલગ રોમાંચ આપે છે. નડાબેટ સીમા દર્શન દરમિયાન માણો ઐતિહાસિક ધરોહર અને મહત્વના સ્થળો જે આપને આનંદની અને સંતોષની અનુભૂતિ કરાવશે.